İran XİN – Ümidvarıq ki, Azərbaycan Tehrandakı səfirliyin fəaliyyətini bərpa edəcək

İran Azərbaycanın Tehrandakı səfirliyinin fəaliyyətini bərpa edəcəyinə ümid edir.

Zengezur.tv xəbər verir ki, bunu İran Xarici İşlər Nazirliyinin (XİN) mətbuat katibi Naser Kənani brifinqdə deyib.

O, İran və Azərbaycan XİN rəhbərləri Hüseyn Əmir Abdullahianla Ceyhun Bayramov arasında telefon danışığını və Azərbaycan Respublikasının Tehrandakı səfirliyinin fəaliyyətinin bərpa prosesini xatırladıb.

“Son 2-3 ay ərzində iki ölkə bir sıra nümayəndə heyəti mübadiləsi aparıb. Bu mübadilələr iki ölkənin xarici işlər nazirləri arasında baş tutmuş telefon danışıqları zamanı və Bakı şəhərində hər hansı rəsmi öhdəlik olmadan keçirilmiş şəxsi görüşdəki müzakirələrdə əldə edilmiş razılaşmalardan sonra baş verib.

Bu razılaşmalara və hər iki ölkənin qarşılıqlı siyasi qətiyyətinə əsaslanaraq, müxtəlif nümayəndə heyətlərinin mübadiləsi keçirilib. İki ölkə arasında çox sayda məsələləri əhatə edən danışıqlar prosesi xüsusən təhlükəsizlik, məhkəmə sistemi və iqtisadiyyat sahələrində müsbət dinamika nümayiş etdirib”, – o deyib.

Kənani qeyd edib ki, İran görülən tədbirlər uğurla başa çatdıqdan sonra Azərbaycanın Tehrandakı səfirliyinin fəaliyyətinin bərpa olunacağına ümid edir. Bu proses əlverişli və vədverici olaraq nəzərdən keçirilir.

Xatırladaq ki, yanvarın 27-də Azərbaycanın İrandakı səfirliyinə silahlı hücum olub. Nəticədə səfirliyin bir əməkdaşı həlak olub, iki nəfər yaralanıb.